Un cumio alternativo por e para o pobo
Baixo a mensaxe de “cambiemos o sistema e non o clima”, as rúas de Montreuil acolleron unha Aldea Mundial das Alternativas, un fórum de debates sobre clima e un mercado campesiño.
07 decembro 2015
11:29
Marcha polo clima durante o Cumio Cidadán. L. G.
PARÍS // Mentres os técnicos do Cume do Clima de París (COP21), terminaron a primeira semana de negociacións con escasos avances sobre o texto do acordo, os cidadáns non esperan impasibles aos resultados. 30.000 persoas acudiron este fin de semana ao chamado Cume Cidadán polo Clima, que tivo lugar en Montreuil -unha localidade ao leste de París- durante os días 5 e 6.
Convencidos de que o pobo ten as solucións para controlar o cambio climático e cativados ademais pola posibilidade de expresarse na única manifestación que non foi prohibida baixo o estado de emerxencia que reina en Francia, unha pequena marcha formouse o sábado en Montreuil a ritmo de batucada, cunha Estatua da Liberdade fumarenta, un Papá Noel anticonsumismo e varios osos polares. “A pesar dos atentados (e o estado de emerxencia) decidimos manter a manifestación porque a xente necesita expresarse e estar xunta”, explicou Patrick Bessac, alcalde de Montreuil.
Baixo a mensaxe de “cambiemos o sistema e non o clima”, as rúas de Montreuil acolleron unha Aldea Mundial das Alternativas, un fórum de debates sobre clima e un mercado campesiño. A praza do Concello lucía adornada cunha coloreada árbore da vida de cuxa estrutura colgaban lazos con mensaxes ambientais. Os visitantes transitaban o espazo, organizado na súa gran maioría por voluntarios, desde as mesas de debate, ás mesas de información, pasando polos postos de produtos do mercado. Dúas carpas maiores ofrecían comida a prezos populares, ambientadas por concertos de bossa nova, reggae ou rap, entre outros.
“Este é un momento por e para o pobo, porque nós temos as alternativas para comezar a cambiar este sistema que tanto dano está a facer ao clima”, afirma Marion Boursier, que traballa como voluntaria axudando a Alternatiba, un dos colectivos organizadores. Marion expresa que considera de vital importancia que os negociadores pechen un acordo e que haxa maior implicación das multinacionais, pero cre firmemente que non pode haber un cambio sen unha cidadanía concienciada e participativa.
Dentro da ampla programación do fórum de debate, que contou con máis de 250 relatorios diferentes, destacou a presentación do colectivo “Confiscadores de Cadeiras” (Foucheus deas chaisses, en francés), que durante os tres meses previos á COP21 requisaron 195 cadeiras de oficinas bancarias que invisten os seus fondos en paraísos fiscais e que prometen devolverlles cando estes bancos reinvistan ese diñeiro en transición climática.
Entre as 277 solucións presentadas nestes dous días puideron verse máquinas de xeados que funcionan con paneis solares, bicicletas que activan depuradoras de auga ou propostas de cidades sen coches, repartidas polos once barrios temáticos da Aldea Mundial de Alternativas.
Unha das imaxes que máis chamou a atención da fin de semana brindárona os 30 indíxenas de 17 países diferentes, desde Mongolia ata Australia ou Indonesia, que subidos nun barco percorreron o río Sena e realizaron un ritual para pedir unha acción climática urxente por parte dos gobernos.
“Os cidadáns teñen as solucións para o cambio climático, eles xa as poñen en marcha, pero agora tócalle aos gobernos apropiarse deste desafío e saír da COP21 con compromisos reais”, afirma Celia Gautier, consultora da Rede pola Acción Climática en Francia.
Co impulso do cume climático cidadá, a sociedade civil inaugura este luns o Centquatre, un espazo cultural ao norte de París que acolle durante toda a semana a denominada Zona de Acción Climática popular (ZAC). “Sen mobilización da sociedade civil non hai presión e sen presión os gobernos son incapaces de actuar máis aló dos seus intereses privados”, afirma Juliette Rousseau, coordinadora da Coalición Clima 21.
Fonte: http://www.lamarea.com/2015/12/07/una-cumbre-alternativa-por-y-para-el-pueblo/
